ავკრძალოთ სექსი და მისთანები!

მე, როგორც საქართველოს მოქალაქე, ვწუხვარ საქართველოსა და მსოფლიოში შექმნილ ვითარებაზე. ქვეყნიერებაზე არსებული მდგომარეობა, ნათლად მიუთითებს იმაზე, რომ ადამიანებმა არ იციან რა უნდათ (?) და არ ესმით რა სჭირდებათ! (?) აქედან გამომდინარე, მცოდნენი (?) უნდა დავსხდეთ და მივუთითოთ მათ - რა აკეთონ, რა არ აკეთონ (?) და ა.შ.

გლობალური ხასიათის პრობლემა გახლავთ სქესობრივი გზით გადამდები დაავადებების გავრცელების მასშტაბები. თუ სტატისტიკას გადავხედავთ, მიხვდებით რომ თვალთა დახუჭვა და ყურთა მოყრუება არ შეგვიძლია (?) და ჩვენი მოქალაქეობრივი შეგნება მოქმედებისაკენ (?) მოგვიწოდებს!

სქესობრივი გზით გადამდები დაავადებები (სგგდ) არის დაავადებები, რომლებიც უპირატესად ვრცელდება ვაგინალური, ანალური ან ორალური სქესობრივი კავშირით. აღნიშნული ინფექციები უფრო ხშირად ორგანიზმის იმუნიტეტის დაქვეითების შემთხვევაში ვითარდება. არ არსებობს მათი საწინააღმდეგო ვაქცინა. ისინი იწვევენ ისეთ სერიოზულ გართულებებს, როგორებიცაა მხედველობის დაკარგვა, უნაყოფობა და სიკვდილი. სქესობრივი გზით გადამდები დაავადებები (სგგდ) ვრცელდება ძალიან სწრაფად; ყოველწლიურად უამრავი ადამიანი ინფიცირდება და უმეტეს შემთხვევაში მათი ასაკი არ აღემატება 30 წელს.

გადაცემის გზები:

დაუცველი სქესობრივი კავშირი (პრეზერვატივის გარეშე)

დაავადებულთან მჭიდრო საყოფაცხოვრებო კავშირი

ადამიანის იმუნოდეფიციტის ვირუსით (აივ) გამოწვეული ინფექციის/შიდსის, სიფილისის, B და С ჰეპატიტის შემთხვევაში, ინფიცირებული სისხლი

დაავადებული დედა (ინფექცია გადადის ნაყოფზე და ახალშობილზე) ( წყარო )

იმის უკეთ წარმოსადგენად, თუ რამდენად საგანგაშოა შექმნილი ვითარება თანამედროვე მსოფლიოში, გთავაზობთ სტატისტიკურ მონაცემს: თუ UNAIDS-ს დავუჯერებთ, 2009 წლის ბოლოსკენ HIV/AIDS-ით დაავადებულთა რაოდენობამ 33.3 მილიონი შეადგინა ( აქედან 2.5 მილიონი ბავშვია ) ( წყარო )

რაღა თქმა უნდა, ყველანი ვთანხმდებით რომ სგდდ პრობლემაა და მისი პრევენციისთვის შესაბამისი ზომების მიღებაა საჭირო. ფაქტია, (?) რომ მხოლოდ მოწოდებებითა და უსაფრთხო სექსის აგიტაციით შედეგს ვერ ვაღწევთ. ამიტომაც ნაცად ხერხს მივმართოთ და დაუცველი სექსი ავკრძალოთ! (?)

მაგალითად: ახალგაზრდა მამაკაცი, რომელიც პრეზერვატივის გარეშე სექსში შემჩნეული იქნება 500 ლარით დავაჯარიმოთ! ხოლო იმ შემთხვევაში, თუკი ასეთი საქციელი ხელახლა განმეორდება - დამნაშავე (?) ციხეში ჩავსვათ! რატომაც არა - ასეთების მომრავლება მაგალითი იქნება მომავალი თაობებისთვის და მათ გახრწნის პროცესს დააჩქარებს! (?) თუ ვინმე თავის მოკვლის მცდელობაში შემჩნეულ იქნება, მას უნდა დავაკისროთ ადმინისტრაციული ჯარიმა, ვთქვათ - 10 000 ლარის ოდენობით და თუ ვერ გადაიხდის ციხეში ჩავსვათ.  

წინა აბზაცში გამოთქმულ მოსაზრებას ბევრი სისულელედ შერაცხავს და იტყვის: გაურეკიათო! მაგრამ, საკმარისია „პრეზერვატივის გარეშე სექსი“ „მარიხუანის მოხმარებით“ ჩავანაცვლოთ და იგივე ხალხი, იტყვის რომ მარიხუანის მოხმარება ამორალური საქციელია და ა.შ.

ასაკრძალავ პროდუქტების/ქმედებების სიაში, სექსს უმნიშნველო ადგილი უკავია. აუცილებლად უნდა ავკრძალოთ ისეთი, ჯანმრთელობისათვის და/ან ქართული საზოგადოებისათვის მავნე პროდუქტები და/ან ქცევები როგორებიცაა: თამბაქო, ალკოჰოლი, ცხიმიანი საჭმელები, მარილი ან ცუდი სიტყვების წარმოთქმა, ეროტიკული ფილმების ნახვა, დაუბანელი ხელებით ჭამა და ა.შ.

როდესაც პიროვნება მსგავსი სახის მოთხოვნებით გამოდის, ეს ნიშნავს იმას, რომ ამ პიროვნებას საუკეთესოდ ესმის და ხედავს საზოგადოებრივ, მეტიც - ზოგადსაკაცობრიო, პრობლემებს (?) და მას, როგორც განათლებულ ადამიანს და სხვებზე მეტად მცოდნეს, უფლება აქვს დააწესოს შეზღუდვები ან გასცეს რეკომენდაციები სხვათა ცხოვრების მოწყობის შესახებ.

ჩვენში ასე პოპულარული ბრძნადმეტყველების ნიმუში კი გვეუბნება: „ყველამ თავის ბოზ მამიდას მიხედოსო!“

ქართულ ლოგიკის ფარგლებში რომ ჩავჯდე, ასეთ მაგალითს გთავაზობთ: თვით ღმერთიც კი - თავისუფალი ნების მინიჭებით, უარს ამბობს ადამიანების მარიონეტებივით მართვაზე და ადამიანებს საკუთარი ცხოვრების ისეთნაირად მოწყობის საშუალებას გვაძლევს, როგორც ეს ჩვენ გვსურს. აი სატანა კი, სიკეთის გაკეთებას გვიშლის და სხვადასხვა ქმედებებში გვზღუდავს!

აბა ქართველნო - ჩვენ რომელს დავუჯეროთ, რომელს მივბაძოთ?

ავრკძალოთ სექსი და მისთანები?

* სიმბოლო (?) - აღნიშნავს WTF - ს

(c) საბა ჯაჯანიძე 2011 წ.